ဆင်းရဲရတဲ့ အဓိက အကြောင်းအရင်းများ

ဆင်းရဲတာကို ရောင့်ရဲတင်းတိမ်မှု မဟုတ်ရင်လည်း ရိုးသားဖြူစင်မှုလို့ ကျွန်ုပ်တို့ ပတ်ဝန်းကျင်တွေမှာ လက်ခံထားကြပါတယ်။

ဒါကြောင့်မို့လို့ ဆင်းရဲမှုကနေ ရုန်းကန်ဖို့ မကြိုးစားကြတော့တာပဲ ဖြစ်ပါတယ်။ 

ဆင်းရဲမှုကို အကောင်းမြင်ပြီး ၊ ငွေရေးကြေးရေးကိုတော့ အကောင်းမမြင်ကြပါဘူး။ ငွေကို ပိုင်ဆိုင်ထားရင် အပြစ်သားတစ်ဦးလို ခံစားနေကြတယ်လို့ Poor Dad and Rich Dad (ဆင်းရဲတဲ့ ဖခင်နဲ့ ချမ်းသာတဲ့ ဖခင်) ဆိုတဲ့ စာအုပ်မှာ အသေးစိတ်ရှင်းလင်း ဖော်ပြထားပါတယ်။

ငွေကို အကောင်းမမြင်တတ်တာက ဆင်းရဲရတဲ့ အဓိက အကြောင်းအရင်းမှာ ပါတယ် လို့ အဲဒီစာအုပ်မှာ ပြောပြထားပါတယ်။

ငွေဆိုတာ လောဘကြီးတဲ့သူတွေသာ ပိုင်ဆိုင်ချင်ကြတာပါ အစရှိတဲ့ ငွေကြေးအပေါ် အယူအဆလွဲမှားနေတာကြောင့် ဖြစ်တယ်ဆိုတာကို ထပ်လောင်း ပြောပြထားပါတယ်။

ဒါကြောင့်မို့ ကိုယ့်ရဲ့ ဘ၀အတွက် လူချမ်းသာတစ်ယောက်လို တွေးတတ်ဖို့ အရမ်းကို လိုအပ်ပါတယ်။

ချမ်းသာချင်ရင်တော့ ပထမဦးဆုံး သင့်အနေနဲ့ ငွေကြေးအပေါ် ရှုမြင်ပုံကို ပြောင်းလဲပစ်လိုက်ဖို့ လိုအပ်ပါတယ်။

ဒုတိယအချက်ကတော့ ပိုင်ဆိုင်မှု (Asset) နဲ့ ဝန်ထုပ်ဝန်ပိုး (Liability) ဆိုတာကို သိရှိထားဖို့ အရမ်းကို လိုအပ်ပါတယ်။

အဲဒီစာအုပ်မှာ ဒီအကြောင်းအရာနဲ့ဆိုင်ပြီး ဆက်လက်ရှင်းလင်းထားပါတယ်။

လူတွေဟာ သူတို့နေတဲ့ အိမ်ကို ပိုင်ဆိုင်မှု (Asset) လို့ ထင်နေကြပါတယ်။ တကယ်တော့ ကိုယ်နေတဲ့ အိမ်ဟာ ဝန်ထုပ်ဝန်ပိုး (Liability) ဖြစ်နေပါတယ်။ ဘာလို့လဲဆိုတော့ အိမ်ကနေ ဝင်ငွေကောင်းကောင်း ပြန်ရရှိအောင် မလုပ်နိုင်တဲ့အပြင် အိမ်အတွက် သုံးတဲ့ ကုန်ကျစားရိတ်က ပိုများနေလို့ ဖြစ်ပါတယ်။

တကယ်လည်း ပြန်စဉ်းစားပြီး ဆင်ခြင်ဖို့ လိုအပ်ပါတယ်။

အိမ်ဆောက်ဖို့ အသုံးစားရိတ် ကြီးကြီးမားမား သုံးလိုက်၊ စျေးအကြီးဆုံး ပစ္စည်းတွေ ဝယ်လိုက်၊ နောက်ဆုံးပေါ်ကားတွေ ဝယ်လိုက် ပျက်ရင် ပြန်ပြင်လိုက်နဲ့မို့ ရင်းနှီးမြှပ်နှံဖို့တော့ ငွေကို အနည်းငယ်သာ သုံးနိုင်တော့မှာ ဖြစ်ပါတယ်။

ဒါကြောင့် အိမ်နဲ့ ကားတွေဟာ ဝန်ထုပ်ဝန်ပိုး (Liability) မှာ ပါဝင်နေတာမို့ သင့်အနေနဲ့ ချမ်းသာတဲ့သူလို အတွေးမျိုးလိုချင်ရင်တော့ ဖော်ပြသွားတဲ့ အချက် (၂) ချက်ကို သင် လက်ခံကျင့်သုံးဖို့ လိုအပ်ပါတယ်။

ဒါဆိုရင်တော့ သင်ဟာ အကြွေးနွံထဲကိုလည်း မရောက်တော့ဘဲ ၊ ရုံးအလုပ်ထဲမှာပဲ ဘ၀ကို ကုန်ဆုံးသွားတာမျိုးလည်း ဖြစ်တော့မှာ မဟုတ်ပါဘူး။ ဒါဆိုရင် ဆင်းရဲတဲ့ဘ၀ကနေလည်း အလိုလို လွတ်မြောက်သွားမှာ ဖြစ်ပါတယ်။

နောက်ဆုံး အနေနဲ့ Rich Dad and Poor Dad ရဲ့ စာရေးသူပြောထားတာလေးနဲ့ အဆုံးသတ်ချင်ပါတယ်။

"ဆင်းရဲတဲ့ ဖခင်က ပြောပါတယ် ချမ်းသာမှုထက် ပျော်ရွှင်မှုကို ပိုပြီး လိုလားပါတယ်။ ဒါပေမယ့် ချမ်းသာတဲ့ ဖခင်ကတော့ နှစ်ခုလုံးကို ဘာလို့ မရနိုင်မှာလဲ ? လို့ ပြောပါတယ်။"